Qualchì settimana fà, ci era una reunione publica di Corsica Libera in Migliacciaru. Avia participatu à i dibattiti, eppò dopu aviamu discutatu inseme di a situazione pulitica.

Nunda ùn ci pudia lascià pensà chì issa discursata era l’ultima.

Colmu d’energia, cum’è d’abitutine, mi presentava qualchì idea nova à mette à u serviziu di a Corsica.

Quante volte hà spartu a so riflessione incù l’altri rispunsevuli naziunali, eiu è tant’ altri. Ancu s’ellu ùn hà participatu à a redazzione di u nostru prugettu « Corsica 21 », ci averà ritruvatu parechje di e piste tracciate da ellu stessu dece anni fà…

Perchè era un precursore, Roger. Ùn timava micca di sorte da e strade cunnisciute, per traccià i chjassi – ancu puru petricosi – di l’avvene.

Per ellu, l’indipendenza ùn era solu una parolla : circava i mezi cuncreti di custruisce l’ecunumia di a Corsica suvrana di dumane.

Roger era attempu omu di riflessione è omu d’azzione. Hè statu di tutte e lotte, pulitiche è sindicale. Hà cunnisciutu a prigiò. È malgratu a maladia, nunda ùn hà mai pussutu caccià li a so fede, a so generosità, u so surisu maliziosu è issu sguardu di zitellu ch’ellu purtava nantu à u mondu.

Addiu amicu.

L’altru ghjornu, standu à sente u « flash info » di RCFM, aghju intesu dì, da u giurnalistu, chì l’Aiaccini avianu da « rivultassi » ! Piombu ! Cosa si passa in Aiacciu ? U disimpiecu, i prezzi chì crescenu, a crisa di l’alloghju ? Ma tuttu què ci hè ancu quì, è nimu si rivolta… Aghju dumandatu à un amicu aiaccinu. M’hà rispostu : « Ùn hai capitu nunda ! Ghjè l’ACA chì ha persu assai scontri. Avà, li tocca à rivultassi ! » Ah ! Allora anu a ragiò ! U ballò, ùn ci capiscu tant’affari, ma mi pare qualcosa d’assai impurtante. A sapete chì, ind’u nordu di a Corsica, ci hè un populu turchinu (« le peuple bleu »). A prima volta chì ne aghju intesu parlà, aghju pensatu chì una culunia di Schtroumpfs s’era stallata ind’u circondu di Bastia. Ùn m’inchietava manc’appena. Ghjè un populu simpaticu, i Schtroumpfs. È pò sò chjuculetti. Ùn ci ponu mancu piglià a suprana, ancu per esse una grossa culunia… Ma in fatti, ùn era micca què. U populu turchinu, sò i passiunati di u « Sporting ». A passione, ghjè a passione ! A cunniscite a canzona : « À tutti i passiunati di football, date li un ballò, date li un ballò ; à mè, date mi un pastizzu, à mè, date mi un pastizzu… ».

Eiu, un sò micca passiunatu di ballò. Pastizzu, ùn ne beiu micca. Eiu, sò cacciadore. Dunque, mi sò scrittu à un partitu puliticu di cacciadori. È prisentemu candidati à l’elezzione ! Perchè, eiu, vogliu chì u presidente di a Republica sia un cacciadore. Ch’ella sia una republica francese, corsa o ancu puru americana, pocu impreme. Ma ci vole chì u presidente sia, cum’è noi, un cacciadore. Perchè solu un cacciadore pò capisce i prublemi di i cacciadori. I guai di a pignata, i sà u cuchjarone ! Casumai u nostru candidatu ùn sia micca elettu, ci fermerà una soluzione : a rivolta. I sustenidori di ballò anu unepoche di  « fusées » è qualchì buttiglietta viota di « Coca ». Noi, avemu un veru arsanale : carabbine « 270 », fucili « 12 super magnum », eccetera… Allora, attenti ! Soprattuttu chè no’ pudemu ancu fà l’unione cù i sustenidori di u Sporting, quelli di u Gazelec, incù l’orsu di l’ACA è ancu quellu di Corti. Senza parlà di i passiunati di pastizzu, chì sò una vera armata. Quessi, sò terribuli, mì ! Quandu anu betu, l’omi li parenu mosche.

Allora, femu l’unione! Iè, sicuramente chì a pudemu fà, l’unione ! Finalmente, simu tutti Corsi. Mi l’hà detta u miò amicu naziunalistu : ancu u populu turchinu ghjè « partie intégrante » di u populu corsu !

U Pichju    

« Sottu à le palme di San’ Niculà… »

Cantata da u pueta, issa piazza simbulizeghja a nostra cara cità.

Issa piazza induve avemu amparatu à marchjà.

Induve, qualchì annu dopu, ghjucavamu à pallò, quandu u « chjappacà » ùn ci era…

Induve, zitelloni, spassighjavamu à bande, è scuntravamu qualchì gruppu d’anzianetti chì si scallavanu l’osse à u sole…

Tutti i Bastiacci - giovani, vechji è criature - si ritruvavanu nantu à issa piazza : à chì falava da a citatella, à chì venia da Lupinu…

Oghje chì ghjè oghje, cuntinueghja à campà a nostra piazza. Si ponu sempre sente, sottu à le palme di San’ Niculà, i discorsi di i vechji è i mughji di i zitelli…

Ma si vede dinù chì e cose anu cambiatu : i caffè sò spessu vioti è, ancu l’estate, ùn si ritrova issa folla di ghjente ch’ellu ci era tandu, tutte e sere, sin’à tardi. A nostra lingua si sente pocu, chì, ora mai, l’affari sò in francese…

Bastia, cità à l’anima prufonda, diventerà una « villa » cum’è un altra ? U nostru arte di campà lascerà a piazza à l’usi furesteri ?

Ùn ci hè fatalità, basta à vulè… è à fà.

Ma una Bastia bastiaccia ùn si pò cuncipisce senza una Corsica corsa. L’identità nostra ùn si deve lascià annigà. Ùn hè mancu appena chjuditura, chì face parte di a ricchezza di u Mediterraniu.

Cumbattimu dunque per chì l’affari sianu in corsu in Toga, in San’ Ghjisè, in Paese Novu. Ma dinù altrò, da Ersa à Bunifaziu.

E noi Bastiacci, lasceremu à i nostri figlioli a dulcezza latina di a nostra vechja cità…

« Sottu à le palme di san’ Niculà… »

Ghjuvan Guidu Talamoni

Un annu chè tù sì partutu,

Circhemu indarru a to presenza.

A notte hè bughja, u mare mutu.

Di lu Fiumorbu, la cuscenza

Eri tù, è, di la saetta

Ne fusti lu maestru altieru ;

È di la machja, è d’a filetta,

L’innamuratu più sinceru.

Un annu chè tù sì partutu,

Eppuru, sì quì issa sera,

Si sguassa stu dulore acutu.

A to memoria bianca è nera,

È la to voce, è lu to visu,

È tutte le stonde passate…

Avà ‘ssu tesoru indivisu

Schjariscerà e nostre strade.

Ghjuvan Guidu Talamoni