Peccatu ch´ella sia cascata nantu à M. Lebranchu, chì, in Parigi, ci hè assai peghju. Ma quantunque, a Corsica chì ricusa di riceve un ministru francese, ghjè a prima volta... Torna un sforzu, Paulu Giacobbi: pudete accumpagnà u prefettu Mirmand à l'aeroportu?

Qualchì filare per Pilou, letti in a ghjesgia di Corti...

À Petru Lavighju

A to parolla tace,

a to parolla amica

colma d’umanità,

di calore fraternu.

A to parolla tace

è l’estru generosu

di la to corta vita

lascia un viotu mensu.

A to parolla tace,

ma in stu ghjornu tetru

ci ferma u to surisu

per schjarisce dumane.

 Addiu, amicu caru.

« La législation européenne n’est pas incompatible avec le statut de résident. » (Henri Malosse, Presidente di u Cumitatu Ecunomicu è Suciale auropeu, sta sera, emissione “Cuntrastu”, nantu à RCFM et FR3 Corsica).

Dipoi anni è anni, quanti bugiardi anu dettu u cuntrariu?

Un bellu scrittu, interessante assai.
Ma quantunque… si pò aghjustà qualcosa. A nostra, a generazione, fora di l'aspetti ecunomichi (chì sò impurtanti, a sò), hè nata ancu più male. U populu corsu smaria, è i nostri anziani, per a più parte, avianu accittatu di diventà Francesi "cum´è l'altri". Ùn hè una critica, chì i corci avianu u so chì fà: ci vulia à campà, à fà campà a famiglia... Ci eranu e guerre, l'esiliu... A nostra, a generazione, pudia vive megliu nantu à u pianu materiale, ma era destinata à esse a prima generazione francese. Eppò ci hè stata a rivolta, micca a rivoluzione cum´è a credianu certi, ma a rivolta. Mi pare assai megliu, a rivolta. Nantu à stu puntu, hà a ragiò Camus, mi pare. Ci hè stata a rivolta è pò ci sò stati i sbaglii. Ma a rivolta senza sbaglii, hè difficiule... A generazione di i nostri figlioli, quella di Massimu, ferà megliu chè noi. Ne sò persuasu. À noi, ci tuccava à dì innò. A nova leva dicerà di sì. Di sì à l'avvene, à una strada nova, à una manera d'esse corsu è d'esse di issu mondu. Senza dubbitu è senza timore alcunu. Averà a custruì un paese, è ùn ci hè più bellu prugettu. In fattu, à mè mi pare chì, s'è no riflettimu una cria, issa nova leva hè forse nata... più chè bè! Ma finalamente, trà e linee, ghjè propiu ciò ch´ellu scrive Massimu!

Jean-Guy Talamoni

Sta mane nantu à RCFM, torna un specialistu francese di i "maffiosi corsi". Eppò à meziornu... dui altri! Quessi custì anu trovu u mezu di campà nantu à u nostru spinu. Cum´ellu dicia Mitterrand di quelli chì surtianu libri contru à ellu: "Que voulez-vous, ce sont mes pauvres..."