Overblog Suivre ce blog
Editer l'article Administration Créer mon blog
24 janvier 2009 6 24 /01 /janvier /2009 16:37

Quattr’ anni fà, ci hè statu un referendum nantu à l’evoluzione istituziunale di a Corsica. Hà vintu u « nò », per una manata di voti, incù un arrubbecciu eletturale tremendu, in particulare ind’u nordu di a Corsica. È certi pretendenu chì per via di issa carnavalata, u statutu di u nostru paese averebbe da firmà listessu per l’eternu…

Noi, dimu ch’ellu cambierà.

 

In Auropa, tuttu si move. Ci vole à fighjà appena in giru à noi : Malta hè intrata in l’Unione. Sin’à pocu fà, Bruxelles ùn ne vulia mancu sente parlà, chì li paria troppu chjuca, iss’isulella. U Montenegro hè diventatu indipendente (u soiu, u referendum, ùn hè micca statu arrubbatu !). A Catalogna hà avutu un novu statutu, di ghjungnu 2006. Li sò state date cumpetenze linguistiche, fiscali, è ancu a gestione di l’immigrazione… È noi, ne simu sempre à sicutera !


Eppuru, u sistema stituziunale corsu ùn pò micca viaghjà : trè assemblee per 280.000 abitanti ! Ci sarebbe da ride sè l’affare ùn era cusì calamitosu… Senza parlà di tutti l’urganisimi, cummissioni, cumitati, è varie amministrazioni chì s’accupanu di listessi cartulari. Un esempiu : per un prublema agriculu, si pò pichjà à a porta di a camara d’agricultura di a Corsica suprana, o di quella di a Corsica suttana, o di a camara regiunale, o di a DDA d’Aiacciu, o di quella di Bastia, o di a DRAF, o di l’ODARC… In ogni locu, ci sò scagni à buzeffu, capi machja è sottu capi machja chì si rinvianu i clienti. Quessi, i disgraziati, à mumentu datu, ùn sanu mancu più induve pichjà di capu ! Kafka averebbe pussutu fà in Corsica u so più bellu libru…

Nantu à u pianu puliticu, si sà chì i Cunsiglii generali sò u nidu di u clanisimu. L’affare funziuneghja bè : u merre di u paese porta i so voti à u Cunsigliere generale è quessu li dà qualchì sollu per rifà u muru di u campusantu o un pezzatellu di strada. Sti solli ùn sortenu micca da a so stacca chì li sò stati dati da u Presidente di u Cunsigliu generale… contru à u so votu ! Credite chè tuttu què hè una caricatura ? Allora, dumandatevi perchè i solli falanu sempre in listesse stache è perchè l’impiechi sò sempre dati à quelli chì portanu parechji voti… Davanti à una tale situazione, si po cantà a canzona « Chì fà, chì ci si pò fà ? ». Ma si pò dinù dà a risposta : ci vole à strughje stu sistema. Quessa dinù, a cunniscite, a canzona ? I naziunalisti a cantanu dipoi trent’anni ? Ghjè vera. Allora ùn ci vole più à cuntentassi di ripete « Delenda Cartago »… Ci vole à falla !

 

Rimpiazzà i dipartimenti da una cullettività unica, dà e cumpetenze di i Cunsiglii generali à un’ Assemblea di Corsica pruvista di u pudere legislativu… Tuttu què ùn basterà micca per salvà a Corsica, sicuramente. Ma purterà un colpu tremendu à a citatella clanista è permetterà una gestione più logica  - è soprattuttu più chjara - di l’affari publichi in lu nostru paese. Eppò, à tempu, rinfurzerà u sintimu d’unità di u nostru populu. Rammintatevi chì Napulione Bonaparte avia digià vulsutu creà dui dipartimenti per spiccà i Corsi è addebbulisce a nostra cuscenza naziunale. Sicuramente, parechji Bastiacci chì anu dumandatu, ind’è l’anni settanta, di vultà à l’anzianu sistema di i dui dipartimenti, l’anu fatta incù sincerità, cridendu ch’ellu purterebbe una nova armunia territuriale, chì era più chè nicessaria ma chì si pudia fà incù una sola cullettività. U risultatu, avà, u cunniscimu bè : iss’ armunia ùn hè mai ghjunta è i nostri guai sò stati duppiati !  A cunfusione attuale ùn pò serve chè issi persunagi torbidi chì ci suchjanu u sangue, è chì portanu a nostra vechja nazione à a ruvina.

 

Ghjuvan Guidu Talamoni

 

 

Partager cet article

Repost 0
Published by jean-guy talamoni - dans Scritti corsi
commenter cet article

commentaires

Présentation

  • : Jean-Guy Talamoni
  • Jean-Guy Talamoni
  • : Jean-Guy Talamoni est avocat. Président de l'Assemblée de Corse, il a publié deux ouvrages politiques, "Ce que nous sommes" (Ramsay/DCL, 2001) et "Libertà" (2004), ainsi que trois livres sur la langue corse.
  • Contact

Recherche

Pages

Liens